CHIWARMARKA
Kamaqniy
Uk uchuy ayllupis Willkaruna paqarisqa, chay
paqarisqanmantapachas taytamamanqa Apu Chiwarmarkaman sumaqllata uywananpaq qillipusqa.
Chaymantapachas Willkarunaqa Chiwarmarka kamaqninpa sunquchasqan wiñan. Imaynam
machunchikkuna, ñawpanchikkuna kawsayta yachachiwanchik chaykunata
huntachispa.
Chiwarmarkaqa may chikan yachayniyuq,
kallpayuq, qapaq Apu kaspa, mana imamantapas pisipachispa qaqata, huntasqata
uywakun, mana ima llakipipas, muchuypipas urmachispa. Unquptinpas
hampispa, pisipaptinpas kallpachaspa,
allin runa kananpaq yuyaychaspa.
Chayraykutaqmi Willkarunaqa sumaqta
riqsikuspa, añanchakuspa ima kawsan. Manataq imatapas qasillaqa ruranmanchu, imatapas
rurananpaqqa ñawpaqtaraq kamaqninwan rimanakun. Imataña mañakuspapas paymanqa
munasqan mikunata, upyanata haywarispapuni. Mana qasillaqa imapatapas uqarinmanchu,
paymanraq willarinan, paypa yachasqan imatapas ruranan.
Uywa mirananpaqpas, mikuy puqunanpaqpas
paypuni yachan, paymi uywakuna qawaq, paytaq imaymana waqaychaq.
Willkarunaqa punchaw punchaw apupi uywankunata
michin, watan watan qatankunapi papata qasun, haytankunapitaq sarata tarpun.
Manahinari maymantataq mikunman, kawsanman. Paymi iñiynin, paymi yachachiqnin,
paymi ñanchachiqnin, paytaqmi imaymanan.
Chayna sumaqta Willkarunaqa Chiwarmarka
kamaqninwan uywanakuspa kawsakun, chaywanqa
ayllunpas tak mana imamantapas llakikuspa kusilla purikun.
Chayna sumaq kawsakuchkaptinsi qunqayllamanta
mana riqsisqan runakuna tiyasqan qayllakunapi rikurirqun. Qunqayllamantataqsi aska
kaqniyuq, hatuhatun wasiyuq, karukunayuq ima rikurirqunku. Paytaqsi kikin
runalla ima kasqan kaqnillayuq. Uywachankunapa qipanpi punchaw punchaw, chakran
patapi killan, killan, watantin.
Chaykunata qawaspas sapanpi tapukun,
imanasqantaq chay runakunari imaymanayuq rikurirqun. Chaywantaqsi sunqun
muyuyta qallarin, imaraykuchus paykunaqa qasillamanta imaymanayuq
rikurisqankumanta.
Tuktullas purín, musyarquntaqsi Kamaqnin chay
runakunaman imaymana qusqanmanta. Imaynatachá rimanakunku riki nispa
yuyaymanan.
Chaysi uk punchaw macharisqa kallpachakuspa
piñallaraq kamaqninta tapun, -Tatay, imaraykutaq hawa runakunallaman tukuytari
haywaykurunki. Ñuqatataq qunqarqapuwanki, hinallachu suyakusqayki.
Chay runakunata imaymanayuqta rikuspachá riki
paypas munapakun paykunahina kayniyuq kaytapas. Chaynapichá riki qawanakuy
rikurin.
Chayllamansi yuyaq kamaqninqa uqi punchuchanwan
punchurisqa rikurirquspa, llampu sunqunwantaq wawanta kutichin:
-Ama piñakuychu waway, manam qunqaykichu, qammi
kanki aswan munakusqa wawa, chayraykum mana imatapas quykichu, qamqa uk runamá
kanki, manam kikin kawaqchu, uyariway: -sichus imaymanata quykiman chayqa maypiñachá
kawaq karqa, qunqarquwankimanñachá karqa, chaypacharí pitaq yuyariwanman, pim
chakiwaptinpas, yarqawaptinpas munasqayta haywarimuwanman.
Rikuchkankichu, chay runakunaqa allichá
imaymanayuq kachkankupas ichaqa imaymanapi awqanakuspa, huchachanakuspa,
qawanakuspa mana allinpi kawsanku, chaytachu qampaq munanki. Ariyá allin
wasiyuq kachkankupas, karuyuq, imaymanayuq ichaqa mana sunquyuq, chusaq kawsaq runakuna ari.
Qurilla, qullqilla yuyayniyuq runakunaqa ñakarispam
maypipas kawsanku, manam allin wañuytapas tarinkuchu, qipa punchawman qawarillankipas
maykaman chayna umankupa aysasqan chayasqankuta. Qamtaqmi aswan qapaq sunquyuq kanki,
mana imapi huchachakuspa qispisqa kawsakunki.
Chaymantapachas Willkarunaqa astawanraq kamaqninpi
yuyaymanakuspa ima kasqallan ñanta qatispa kawsakun, Chiwarmarka kamaqninta aswan
munakuywanraq uywakun.
