ARGUEDASPAQ HARAWI

WAÑUY RAYMI

Wayrapa rapinpas pallasqañami,

sarapa chukchamanta ñanniypas kantisqa,

sallqa tarukapas chimpusqañami

Imaymananchikpas ukpa makinpi.

Quri qullqi wikuñapas,

wiñay puñuymi chinkan,

supaypa tinkasqan.

Maypitaq aylluy,

purun sachahina chiqnisqa.

Mayu patapi aqu pallaq urpipas,

waqaqmi kasqa sapanpi,

manaña puriqmasinta tarispa.

Ñuqallaypas pukuy puku,

iskayaspami purini,

chullpi hankata watuykuspa:

Maypiraq mamay,

maypiraq, nispa.

Saqsaywamanpi

sillwi kurupas,

ayqinmi kurumasinmanta:

kawsayñachu kawsay.

Rankachusqa mayupas

ukllapiñami sayarin,

karuchasqa llaqtapi.

Qusqiña kintu ñawi sipaspas,

pimanpas rataqllami kasqa:

Munanakuyri kanñachu.

Waqyapayanim kampas,

Kuraqninchikkunata,

hatun Tawantinsuyu

qispichiq yuyaysapa runakunata:

Qaqap yachayniyuq Pachakutiqta,

Qipan kallpachaq runakunatapas:

Tupaq Amaru,

Willkapasa,

Arguedas,

Hinantinpi runakunata,

Qamtapuni Tayta Intilláy:

Tutayaypichu wañusaq,

Mana sutiyuq,

Mana llaqtayuq,

Mana rimariyniyuq,

      Mana imayuq.