Richard Littlebear sutiyuq runan kay qillqata inglés qallupi qillqarqan, ñuqataq qichwaman tikrarquni.
América mama llaqtapi ñawpa qallunchikkunaqa mana qillqasqallam kawsakurqanku. Chayraqmi kimsa pachaq qhipa watakunallaraq wakin qallunchikkuna qillqasqa rikhurin. Chayta yuyayuyarispan kananchik maypachachus qallunchikta yachachispa.
América mama llaqtapi ñawpa qallunchikkunaqa mana qillqasqallam kawsakurqanku. Chayraqmi kimsa pachaq qhipa watakunallaraq wakin qallunchikkuna qillqasqa rikhurin. Chayta yuyayuyarispan kananchik maypachachus qallunchikta yachachispa.
Chaykunatam mana qunqasunnanchu, manataqmi ñawsahina qatillasunmantaqchu wak runakunap tukuy imaymana ruwasqanta: paykuna imaynatachus qallunkunata yachachinku chay hinatachu ñuqanchik qhichwa qallunchikta yachachisunman, nitaqmi nisunmanchu: imaynatachus gringo rimayta yachachiwarqanchik chhaynata qallunchikta yachachisun nispa.
Chaykunata mana qawarisqanchik raykun, lliw qallunchikkuna yachachiy yuyaywan llamkaykuna manapuni allin puchukaymanchu chayanku, chaymi lliw ima ruwasqanchikpas urmaylla urman, manataq ima ruwasqanchikpas rikhurinchu.
Chhaynata rimarispan Littlebear qillqanta qallirin. Chaymantataqmi sumaq harawita qillqallantaq. Chayta allinta ñawirispa ichachu imallatawanpas rurayta atisunman. Chaykunawantaq yanapakusun mama qallunchikkunata sumaqta takyachinapaq, wiña wiñay kawsananpaq.
Wakinkuna nirqanchik: rimayninchikkunata qillqasun, nispa, hinata ruranchik, chaywanpas kay América mama llaqtapi ñawpa qallunchikkunaqa wañullachkankupunim.
Chaymantapas nillanchiktaq: qillqana simi pirwakunata rurasun sapa qallunchikkunapaq, nispa, chaytapas rurallanchiktaq, chaywanpas qallunchikkunaqa wañuylla wañuruchkanku.
Chaymantapas nillanchiktaq: kuraq yachaywasikunamanta qallu kamayuqkunata hurqusun, paykuna qallunchikta yachaspa qawananpaq, nispa, chaytapas rurallanchiktaq, chaywanpas qallunchikkunaqa wañullackkankupunim.
Chaymantapas nillanchiktaq: yachachisun ayllumasinchik runakunata, paykunapuni qallunchik kamayuq kanankupaq, nispa, chaytapas rurarpallanchiktaq, chaywanpas qallunchikkunaqa wañuykullachkankupunim.
Chaymantapas nillanchiktaq: qullqita mañakusun tata Waminkamanta iskay qallupi, iskay kawsaypi yachachiynapaq nispa, chaytapas rurallanchiktaq, qullqitapas tarinchik, chaywanpas qallunchikkunaqa wañurikapullachkankupunim.
Chaymantapas nillanchiktaq: yachaywasikunapi qallunchikkunata yachachichunku, nispa, chaytapas rurarpallanchiktaq, chaywanpas qallunchikkunaqa wañullachkankupunim.
Chaymantapas nillanchiktaq: imayna kawsayninchikmanhina panqakunata rurasun, nispa, chaytapas rurallanchiktaq, chaywanpas qallunchikkuna wañuylla wañurallanku.
Chaymantapas nillanchiktaq: yanapachikusun allin umayuqkunawan, qallu kamayuqkuna, qallunchikkunata yachachinankupaq, nispa, chaytapas rurarpallanchiktaq, chaywanpas qallunchikkunaqa wañullachkankupunim.
Chaymantapas nillanchiktaq: Grabadora-man machukunaq rimasqanta churasun, nispa, chaytapas rurallanchiktaq, chaywanpas qallunchikkunaqa wañuyllam wañupuchkanku.
Chaymantapas nillanchiktaq: haku rurasun video-nisqakunata, chaypi machunchikkunata qallunchik rimachkaqta, imaymana rurachkaqta churasun, nispa, chaytapas rurallanchiktaq, chaywanpas qallunchikkunaqa wañupullachkankupunim.
Chaymantapas nillanchiktaq: kunanqa CD-ROM-nisqapi qallunchikkuna rimaq runakunata churasun, nispa, chaytapas rurallanchiktaq, chaywanpas qallunchikkunaqa wañupullachkankupunim.
Chaywanpas piñataqchá ninqa: achwan pikunachus qallunchik rimaqkuna kanraq chaykunata rankachurpasun, nispa. Chaymanta qallunchikkuna rimaq manaña kaptin, paykunata kawsarichispa rimanallankupaqpuni, nispa. Chaykuna rurana kamaqa lliwñachá tukukusun, rikcharimunankupaqtaq manaña pi rimaqmasinku kanqañachu, nitaq pipas uyarinqachu, yachanqachu, hapinqachu imatachus nisqanta.
Imatañataq rurasun mana qallunchikkuna wañunanpaqri.
Kay qillqapin niwachkanchik, manam ima rurasqanchikpas, pi minkakusqanchik allin umasapa runapas qallunchiktaqa kawsachinqachu, sichus mana ñuqanchik rimasunchu chayqa. Chayraykum ñuqanchikpuni qallunchik wañuchiqqa kasun, mana wawanchikkunawan rimaspa, maypiña tarikusqanchikpipas mana qallunchikta rimaspa.
Chaymantapas nillawanchiktaqmi: -ama pinqakusunchu imayna qallunchik kasqanmanta, nispa. Amapuni nisunchu: -manam allinchu nispaqa; amapunim nisunchu: -paykunan, chaykunan, haqaykunan, chaqaykunan, qamkunan qalluyku wañuchiq kankichik nispapis. Amaña mana allin ñawpa kawsayta yuyarispa kunanmantapacha tukuy sunquwan imaymana atisqanchikta rurasun. Ichaqa yachananchikmi haykaq, imapachapi, ima ruraytapas, imaynatam wakin llaqtakunapi qallunku taqyachinanpaq rurachkanku chaytapas qawarispa. Manam imapas rurarpayllachu, achtawanpas sunquchakuspa, yuyaychakuspa imatapas rurana.
Quchapampa, tika panchiy killa
Kay qillqan rikhurirqa: G. Cartoni (ed) Stabilising Indigenous languages. 
No hay comentarios:
Publicar un comentario